ಮಳೆಗಾಲ ಎಂದರೆ ತಂಪು ಹವಾಮಾನ, ಬಿಸಿ ಬಿಸಿ ಕಾಫಿ ಜೊತೆಗೆ ಪ್ರಕೃತಿಯ ಸೌಂದರ್ಯವನ್ನು ಸವಿಯುವ ಕಾಲ. ಆದರೆ, ಈ ಕಾಲದಲ್ಲಿ ಮನೆಯೊಳಗೆ ಹೆಚ್ಚಾಗುವ ತೇವಾಂಶ (Moisture) ನಮ್ಮ ದುಬಾರಿ ಬಟ್ಟೆಗಳು ಹಾಗೂ ಶೂಗಳಿಗೆ ದೊಡ್ಡ ಶತ್ರು. ಸರಿಯಾಗಿ ಗಾಳಿ ಬೆಳಕು ಇಲ್ಲದ ವಾರ್ಡ್ರೋಬ್ನಲ್ಲಿಟ್ಟಿರುವ ರೇಷ್ಮೆ ಸೀರೆಗಳು ಮತ್ತು ಲೆದರ್ ಶೂಗಳಿಗೆ ಬಿಳಿಯ ಬಣ್ಣದ ಬೂಷ್ಟು (Fungus) ಹಿಡಿಯುವುದು ಮಳೆಗಾಲದ ಅತಿ ಸಾಮಾನ್ಯ ಸಮಸ್ಯೆ.
ಇದನ್ನು ತಡೆಯಲು ಗಂಟೆಗಟ್ಟಲೆ ಶ್ರಮಪಡಬೇಕಿಲ್ಲ. ವಾರಕ್ಕೆ ಕೇವಲ 15 ನಿಮಿಷ ಸಮಯ ಮೀಸಲಿಟ್ಟರೆ ಸಾಕು, ನಿಮ್ಮ ನೆಚ್ಚಿನ ಹಾಗೂ ಸಾವಿರಾರು ರೂಪಾಯಿ ಬೆಲೆಬಾಳುವ ವಸ್ತುಗಳನ್ನು ಸುರಕ್ಷಿತವಾಗಿ ಕಾಪಾಡಿಕೊಳ್ಳಬಹುದು. ಆ ಸರಳ ಟಿಪ್ಸ್ ಗಳು ಇಲ್ಲಿವೆ.
ದುಬಾರಿ ಸೀರೆಗಳ ರಕ್ಷಣೆಗೆ ಟಿಪ್ಸ್
- ಗಾಳಿಯಾಡಲು ಬಿಡಿ (Air Dry): ವಾರಕ್ಕೊಮ್ಮೆಯಾದರೂ ಕಪಾಟಿನ ಬಾಗಿಲು ತೆಗೆದು ಫ್ಯಾನ್ ಹಾಕಿ. ನಿಮ್ಮ ದುಬಾರಿ ರೇಷ್ಮೆ ಹಾಗೂ ಕಾಟನ್ ಸೀರೆಗಳನ್ನು ಹೊರತೆಗೆದು ಕನಿಷ್ಠ 10-15 ನಿಮಿಷಗಳ ಕಾಲ ಗಾಳಿಯಾಡಲು ಬಿಡಿ. ಇದರಿಂದ ಬಟ್ಟೆಯಲ್ಲಿರುವ ತೇವಾಂಶ ಆವಿಯಾಗುತ್ತದೆ.
- ಬೇವಿನ ಎಲೆ ಅಥವಾ ಸಿಲಿಕಾ ಜೆಲ್: ಕಪಾಟಿನಲ್ಲಿ ಬಟ್ಟೆಗಳ ಮಧ್ಯೆ ಸ್ವಲ್ಪ ಒಣಗಿದ ಬೇವಿನ ಎಲೆಗಳು, ಲವಂಗ ಅಥವಾ ಕರ್ಪೂರವನ್ನು ಬಟ್ಟೆಯಲ್ಲಿ ಕಟ್ಟಿ ಇಡಿ. ಆನ್ಲೈನ್ನಲ್ಲಿ ಸುಲಭವಾಗಿ ಸಿಗುವ ‘ಸಿಲಿಕಾ ಜೆಲ್’ (Silica Gel) ಪ್ಯಾಕೆಟ್ಗಳನ್ನು ಇಡುವುದರಿಂದ ಅವು ತೇವಾಂಶವನ್ನು ಸಂಪೂರ್ಣವಾಗಿ ಹೀರಿಕೊಳ್ಳುತ್ತವೆ.
- ಪ್ಲಾಸ್ಟಿಕ್ ಕವರ್ ಬೇಡ, ಕಾಟನ್ ಬಳಸಿ: ರೇಷ್ಮೆ ಸೀರೆಗಳನ್ನು ಎಂದಿಗೂ ಪ್ಲಾಸ್ಟಿಕ್ ಕವರ್ಗಳಲ್ಲಿ ಇಡಬೇಡಿ. ಬದಲಾಗಿ, ಶುದ್ಧ ಹತ್ತಿಯ (Cotton) ಬಟ್ಟೆಯಲ್ಲಿ ಅಥವಾ ಕಾಟನ್ ಬ್ಯಾಗ್ಗಳಲ್ಲಿ ಸುತ್ತಿಡಿ. ಇದರಿಂದ ಬಟ್ಟೆ ಉಸಿರಾಡಲು (Air circulation) ಸಾಧ್ಯವಾಗುತ್ತದೆ ಮತ್ತು ಬೂಷ್ಟು ಹಿಡಿಯುವುದಿಲ್ಲ.
ಶೂ ಮತ್ತು ಪಾದರಕ್ಷೆಗಳ ನಿರ್ವಹಣೆ
- ನ್ಯೂಸ್ ಪೇಪರ್ ಟ್ರಿಕ್: ಮಳೆಗಾಲದಲ್ಲಿ ಶೂಗಳನ್ನು ರಕ್ಷಿಸಲು ಇದೊಂದು ಅತ್ಯುತ್ತಮ ಮನೆಮದ್ದು. ಶೂಗಳ ಒಳಗೆ ಹಳೆಯ ನ್ಯೂಸ್ ಪೇಪರ್ ಉಂಡೆಗಳನ್ನು ತುರುಕಿ ಇಡಿ. ಇದು ಶೂ ಒಳಗಿನ ಸಂಪೂರ್ಣ ತೇವಾಂಶ ಹಾಗೂ ದುರ್ವಾಸನೆಯನ್ನು ಹೀರಿಕೊಳ್ಳುತ್ತದೆ.
- ಪಾಲಿಶ್ ಮತ್ತು ವ್ಯಾಕ್ಸ್: ಲೆದರ್ ಶೂಗಳಿಗೆ ಮಳೆಗಾಲದಲ್ಲಿ ನಿಯಮಿತವಾಗಿ ವ್ಯಾಕ್ಸ್ ಪಾಲಿಶ್ ಮಾಡುವುದರಿಂದ ಅದರ ಮೇಲೆ ರಕ್ಷಣಾ ಕವಚ ನಿರ್ಮಾಣವಾಗಿ, ನೀರಿನ ಅಂಶ ಒಳಹೋಗುವುದಿಲ್ಲ. ಬೂಷ್ಟು ಹಿಡಿದಿದ್ದರೆ ಮೊದಲು ಒಣ ಬಟ್ಟೆಯಿಂದ ಒರೆಸಿ ನಂತರ ಪಾಲಿಶ್ ಮಾಡಿ.
- ನೈಸರ್ಗಿಕವಾಗಿ ಒಣಗಿಸಿ: ಒದ್ದೆಯಾದ ಶೂಗಳನ್ನು ಒಣಗಿಸಲು ಹೇರ್ ಡ್ರೈಯರ್ ಅಥವಾ ಹೀಟರ್ ಬಳಸಬೇಡಿ, ಇದರಿಂದ ಲೆದರ್ ಹಾಳಾಗಬಹುದು. ಬದಲಾಗಿ ಫ್ಯಾನ್ ಗಾಳಿಗೆ ಅಥವಾ ನೈಸರ್ಗಿಕವಾಗಿ ಗಾಳಿಯಾಡುವ ಜಾಗದಲ್ಲಿ ಒಣಗಿಸಿ. ಶೂ ರ್ಯಾಕ್ ಅನ್ನು ಆಗಾಗ ತೆರೆದು ಗಾಳಿ ಆಡಲು ಬಿಡುವುದು ಕಡ್ಡಾಯ.
ಮಳೆಗಾಲ ಮುಗಿಯುವವರೆಗೆ ನಿಮ್ಮ ದೈನಂದಿನ ಅಥವಾ ವಾರಾಂತ್ಯದ ಬಿಡುವಿನ ವೇಳೆಯಲ್ಲಿ ಈ ಮೇಲಿನ ಸರಳ 15 ನಿಮಿಷಗಳ ನಿರ್ವಹಣಾ ವಿಧಾನಗಳನ್ನು ನಿಯಮಿತವಾಗಿ ಅನುಸರಿಸಿದರೆ, ನಿಮ್ಮ ನೆಚ್ಚಿನ ಸೀರೆ ಹಾಗೂ ಶೂಗಳ ಆಯಸ್ಸು ದುಪ್ಪಟ್ಟಾಗುತ್ತದೆ.