ಪ್ರಸ್ತುತ ನಡೆಯುತ್ತಿರುವ ದೇಶೀಯ ಕ್ರಿಕೆಟ್ ಟೂರ್ನಿ ‘ದುಲೀಪ್ ಟ್ರೋಫಿ’ಯ ಕ್ವಾರ್ಟರ್-ಫೈನಲ್ ಪಂದ್ಯದಲ್ಲಿ ಉದಯೋನ್ಮುಖ ತಾರೆ, ಕೇವಲ 15 ವರ್ಷದ ‘ವಂಡರ್ ಬಾಯ್’ ವೈಭವ್ ಸೂರ್ಯವಂಶಿ ಬ್ಯಾಟಿಂಗ್ನಲ್ಲಿ ವಿಫಲರಾದರೂ, ಬೌಲಿಂಗ್ನಲ್ಲಿ ಅದ್ಭುತ ಪ್ರದರ್ಶನ ನೀಡುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ.
ಬ್ಯಾಟಿಂಗ್ನಲ್ಲಿ ನಿರಾಸೆ ಈಸ್ಟ್ ಝೋನ್ (East Zone) ಹಾಗೂ ನಾರ್ತ್ ಈಸ್ಟ್ ಝೋನ್ (North East Zone) ನಡುವಿನ ಪಂದ್ಯದಲ್ಲಿ ಬಿಹಾರ ಮೂಲದ ಯುವ ಪ್ರತಿಭೆ ವೈಭವ್ ಸೂರ್ಯವಂಶಿ ಅವರ ಮೇಲೆ ಭಾರೀ ನಿರೀಕ್ಷೆಗಳಿದ್ದವು. ವಿಕೆಟ್ ಕೀಪರ್ ಇಶಾನ್ ಕಿಶನ್ ನಾಯಕತ್ವದ ಈಸ್ಟ್ ಝೋನ್ ತಂಡಕ್ಕೆ ವೈಭವ್ ಉಪನಾಯಕರಾಗಿಯೂ ನೇಮಕಗೊಂಡಿದ್ದರು. ಆದರೆ, ಆರಂಭಿಕರಾಗಿ ಕಣಕ್ಕಿಳಿದ ಅವರು ಕೇವಲ 6 ಎಸೆತಗಳನ್ನು ಎದುರಿಸಿ, 2 ಬೌಂಡರಿಗಳ ನೆರವಿನಿಂದ 8 ರನ್ ಗಳಿಸಿ ವಿಕೆಟ್ ಒಪ್ಪಿಸಿದರು. ಇದರಿಂದ ಅವರ ಬಹುನಿರೀಕ್ಷಿತ ಪದಾರ್ಪಣೆ ಬ್ಯಾಟಿಂಗ್ ವಿಭಾಗದಲ್ಲಿ ಕೊಂಚ ನಿರಾಸೆ ಮೂಡಿಸಿತ್ತು.
ಬೌಲಿಂಗ್ನಲ್ಲಿ ಮ್ಯಾಜಿಕ್! ಬ್ಯಾಟಿಂಗ್ನಲ್ಲಿ ಫ್ಲಾಪ್ ಆದರೂ ಎದೆಗುಂದದ ಈ ಯುವ ಆಟಗಾರ, ಎದುರಾಳಿ ತಂಡದ ಎರಡನೇ ಇನ್ನಿಂಗ್ಸ್ನಲ್ಲಿ ಲೆಫ್ಟ್-ಆರ್ಮ್ ಆರ್ಥೊಡಾಕ್ಸ್ ಸ್ಪಿನ್ (Left-arm orthodox spin) ಮಾಡುವ ಮೂಲಕ ಜಾದೂ ಮಾಡಿದ್ದಾರೆ. ನಾರ್ತ್ ಈಸ್ಟ್ ಝೋನ್ ತಂಡದ ಎರಡನೇ ಇನ್ನಿಂಗ್ಸ್ನ 28ನೇ ಓವರ್ ಬೌಲ್ ಮಾಡಿದ ವೈಭವ್, ಕೇವಲ 4 ಎಸೆತಗಳ ಅಂತರದಲ್ಲಿ 2 ಪ್ರಮುಖ ವಿಕೆಟ್ಗಳನ್ನು ಕಬಳಿಸಿ ಸಂಚಲನ ಸೃಷ್ಟಿಸಿದರು.
ತಮ್ಮ ಓವರ್ನ ಎರಡನೇ ಎಸೆತದಲ್ಲಿ ದೊಡ್ಡ ಶಾಟ್ ಹೊಡೆಯಲು ಯತ್ನಿಸಿದ ಕಿಶನ್ ಲಿಂಗ್ಡೋ ಅವರನ್ನು ಔಟ್ ಮಾಡಿದರೆ, ಐದನೇ ಎಸೆತದಲ್ಲಿ ಇಮ್ಲಿವತಿ ಲೆಮ್ಟೂರ್ ಅವರನ್ನು ವಿಕೆಟ್ ಕೀಪರ್ ಇಶಾನ್ ಕಿಶನ್ ಕೈಗೆ ಕ್ಯಾಚ್ ನೀಡುವಂತೆ ಮಾಡಿ ಪೆವಿಲಿಯನ್ಗೆ ಅಟ್ಟಿದರು. ಒಟ್ಟಾರೆಯಾಗಿ ಕೇವಲ 3 ಓವರ್ ಬೌಲಿಂಗ್ ಮಾಡಿದ ಅವರು 11 ರನ್ ನೀಡಿ 2 ವಿಕೆಟ್ ತಮ್ಮದಾಗಿಸಿಕೊಂಡರು.
ಪಂದ್ಯದ ಸ್ಥಿತಿಗತಿ ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಈಸ್ಟ್ ಝೋನ್ ತಂಡ, ಶಹಬಾಜ್ ಅಹ್ಮದ್ (167 ರನ್) ಹಾಗೂ ಸುದೀಪ್ ಕುಮಾರ್ ಘರಾಮಿ (146 ರನ್) ಅವರ ಭರ್ಜರಿ ಶತಕಗಳ ನೆರವಿನಿಂದ 467 ರನ್ಗಳ ಬೃಹತ್ ಮೊತ್ತ ಕಲೆಹಾಕಿತು. ಇದಕ್ಕೆ ಪ್ರತಿಯಾಗಿ ಬ್ಯಾಟ್ ಬೀಸಿದ ನಾರ್ತ್ ಈಸ್ಟ್ ಝೋನ್, ಮೊದಲ ಇನ್ನಿಂಗ್ಸ್ನಲ್ಲಿ ಕೇವಲ 111 ರನ್ಗಳಿಗೆ ಆಲೌಟ್ ಆಗಿ ‘ಫಾಲೋ-ಆನ್’ (Follow-on) ಆಘಾತಕ್ಕೆ ಸಿಲುಕಿತು. ಫಾಲೋ-ಆನ್ ಪಡೆದು ಎರಡನೇ ಇನ್ನಿಂಗ್ಸ್ ಆರಂಭಿಸಿರುವ ನಾರ್ತ್ ಈಸ್ಟ್ ತಂಡ, ಮತ್ತೆ ಕುಸಿತ ಕಂಡಿದ್ದು ತೀವ್ರ ಸಂಕಷ್ಟದಲ್ಲಿದೆ.
ವಿಶೇಷವಾಗಿ ಸ್ಫೋಟಕ ಬ್ಯಾಟಿಂಗ್ಗೆ ಹೆಸರುವಾಸಿಯಾಗಿದ್ದ ವೈಭವ್ ಸೂರ್ಯವಂಶಿ, ಇದೀಗ ಕರಾರುವಕ್ಕಾದ ಬೌಲಿಂಗ್ನಲ್ಲೂ ತಮ್ಮ ಕರಾಮತ್ತು ಪ್ರದರ್ಶಿಸುವ ಮೂಲಕ ತಾನೊಬ್ಬ ಭರವಸೆಯ ಆಲ್ರೌಂಡರ್ ಎಂಬುದನ್ನು ಸಾಬೀತುಪಡಿಸಿದ್ದಾರೆ.