ಕಾನ್ಪುರ (ಉತ್ತರ ಪ್ರದೇಶ): ರಸ್ತೆ ಬದಿಯ ಕಸದ ರಾಶಿಯಲ್ಲಿ ಬಿದ್ದಿದ್ದ ಟನ್ಗಟ್ಟಲೆ ಅವಧಿ ಮುಗಿದ (Expired) ಚಾಕೊಲೇಟ್ ಹಾಗೂ ಟಾಫಿಗಳನ್ನು ಲೂಟಿ ಮಾಡಲು ಜನ ಮುಗಿಬಿದ್ದಿರುವ ವಿಚಿತ್ರ ಹಾಗೂ ಆತಂಕಕಾರಿ ಘಟನೆಯೊಂದು ಉತ್ತರ ಪ್ರದೇಶದ ಕಾನ್ಪುರದಲ್ಲಿ ನಡೆದಿದೆ. ಘಟನೆಯ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದ್ದು, ನೆಟ್ಟಿಗರನ್ನು ಬೆಚ್ಚಿಬೀಳಿಸಿದೆ.
ಏನಿದು ಘಟನೆ? ಕಾನ್ಪುರದ ಪಂಕಿ ಕೈಗಾರಿಕಾ ಪ್ರದೇಶದ (Panki Industrial Area) ಹೆದ್ದಾರಿ ಬದಿಯ ಕಸದ ಡಂಪಿಂಗ್ ಯಾರ್ಡ್ನಲ್ಲಿ ಸ್ಥಳೀಯ ಚಾಕೊಲೇಟ್ ಫ್ಯಾಕ್ಟರಿಯೊಂದು ಅವಧಿ ಮುಗಿದಿದ್ದ ಅಪಾರ ಪ್ರಮಾಣದ ಚಾಕೊಲೇಟ್ ಮತ್ತು ಟಾಫಿ ಬಾಕ್ಸ್ಗಳನ್ನು ಎಸೆದಿತ್ತು. ಈ ವಿಚಾರ ಸ್ಥಳೀಯರಿಗೆ ತಿಳಿಯುತ್ತಿದ್ದಂತೆಯೇ ನೂರಾರು ಜನ ಕಸದ ರಾಶಿಯತ್ತ ದೌಡಾಯಿಸಿದ್ದಾರೆ.
ರಸ್ತೆಯಲ್ಲಿ ಹೋಗುತ್ತಿದ್ದ ಬೈಕ್ ಹಾಗೂ ಕಾರು ಸವಾರರು ಕೂಡ ತಮ್ಮ ವಾಹನಗಳನ್ನು ನಿಲ್ಲಿಸಿ ಚಾಕೊಲೇಟ್ ಆಯ್ದುಕೊಳ್ಳಲು ಮುಗಿಬಿದ್ದಿದ್ದಾರೆ. ಕೇವಲ 30 ನಿಮಿಷಗಳಲ್ಲಿ ಅಲ್ಲಿ ಬಿದ್ದಿದ್ದ ಅಷ್ಟೂ ಚಾಕೊಲೇಟ್ಗಳನ್ನು ಜನ ಖಾಲಿ ಮಾಡಿದ್ದಾರೆ! ಕೆಲವರು ಕೈಯಲ್ಲಿ ಸಿಕ್ಕಷ್ಟು ಎತ್ತಿಕೊಂಡು ಹೋದರೆ, ಇನ್ನೂ ಕೆಲವರು ಚೀಲಗಳು, ಗೋಣಿಚೀಲಗಳು ಹಾಗೂ ರಟ್ಟಿನ ಬಾಕ್ಸ್ಗಳಲ್ಲೇ ತುಂಬಿಕೊಂಡು ಹೋಗಿರುವ ದೃಶ್ಯ ವಿಡಿಯೋದಲ್ಲಿ ಸೆರೆಯಾಗಿದೆ.
ಆರೋಗ್ಯದ ಮೇಲೆ ಗಂಭೀರ ಪರಿಣಾಮದ ಭೀತಿ ಜನ ಈ ಎಕ್ಸ್ಪೈರಿ ಚಾಕೊಲೇಟ್ಗಳನ್ನು ತಿನ್ನಲು ತೆಗೆದುಕೊಂಡು ಹೋದರೋ ಅಥವಾ ಬೇರೆಡೆ ಮಾರಾಟ ಮಾಡಲು ಒಯ್ದರೋ ಎಂಬುದು ಸ್ಪಷ್ಟವಾಗಿಲ್ಲ. ಆದರೆ, ಅವಧಿ ಮುಗಿದ ಆಹಾರ ಪದಾರ್ಥಗಳನ್ನು ಸೇವಿಸುವುದು ಆರೋಗ್ಯದ ದೃಷ್ಟಿಯಿಂದ ಅತ್ಯಂತ ಅಪಾಯಕಾರಿ. ವೈದ್ಯರ ಪ್ರಕಾರ, ಅವಧಿ ಮುಗಿದ ಚಾಕೊಲೇಟ್ನಲ್ಲಿರುವ ಹಾಲು ಮತ್ತು ಕೊಬ್ಬಿನಂಶ ಕೆಟ್ಟುಹೋಗಿ, ಅದರಲ್ಲಿ ಅಪಾಯಕಾರಿ ಬ್ಯಾಕ್ಟೀರಿಯಾ ಮತ್ತು ಫಂಗಸ್ ಬೆಳೆಯುವ ಸಾಧ್ಯತೆ ಇರುತ್ತದೆ. ಇದನ್ನು ತಿಂದರೆ ಫುಡ್ ಪಾಯಿಸನಿಂಗ್, ವಾಂತಿ, ಭೇದಿ, ತೀವ್ರ ಹೊಟ್ಟೆನೋವು ಹಾಗೂ ಅಲರ್ಜಿಯಂತಹ ಗಂಭೀರ ಸಮಸ್ಯೆಗಳು ಎದುರಾಗಬಹುದು.
ಪೊಲೀಸ್ ತನಿಖೆ ಆರಂಭ ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆಯೇ ಎಚ್ಚೆತ್ತುಕೊಂಡಿರುವ ಕಾನ್ಪುರ ಪೊಲೀಸರು ತನಿಖೆ ಆರಂಭಿಸಿದ್ದಾರೆ. ಡಿಸಿಪಿ (ಪಶ್ಚಿಮ) ಖಾಸಿಮ್ ಅಬಿದಿ ಅವರು ಈ ಬಗ್ಗೆ ಪ್ರತಿಕ್ರಿಯಿಸಿದ್ದು, “ಅವಧಿ ಮುಗಿದ ಚಾಕೊಲೇಟ್ಗಳನ್ನು ಎಸೆದಿರುವ ವಿಡಿಯೋ ನಮ್ಮ ಗಮನಕ್ಕೆ ಬಂದಿದೆ. ಪಂಕಿ ಪೊಲೀಸ್ ಠಾಣೆಗೆ ಈ ಬಗ್ಗೆ ಸಮಗ್ರ ತನಿಖೆ ನಡೆಸಲು ಆದೇಶಿಸಲಾಗಿದೆ. ಇಂತಹ ಅವಧಿ ಮುಗಿದ ವಸ್ತುಗಳ ಸೇವನೆ ಸಾರ್ವಜನಿಕರ ಆರೋಗ್ಯಕ್ಕೆ ಹಾನಿಕರ. ತನಿಖೆಯ ನಂತರ ಫ್ಯಾಕ್ಟರಿ ಮಾಲೀಕರ ಹಾಗೂ ಜವಾಬ್ದಾರಿಯುತ ವ್ಯಕ್ತಿಗಳ ವಿರುದ್ಧ ಎಫ್ಐಆರ್ ದಾಖಲಿಸಲಾಗುವುದು,” ಎಂದು ಸ್ಪಷ್ಟಪಡಿಸಿದ್ದಾರೆ.
ನೆಟ್ಟಿಗರ ಆಕ್ರೋಶ ಘಟನೆಯ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಕಳವಳ ವ್ಯಕ್ತವಾಗಿದೆ. “ಜನರಿಗೆ ಕನಿಷ್ಠ ಕಾಮನ್ ಸೆನ್ಸ್ ಇಲ್ಲವೇ? ಕಸದ ರಾಶಿಯಲ್ಲಿ ಬಿದ್ದಿರುವ ಎಕ್ಸ್ಪೈರಿ ಚಾಕೊಲೇಟ್ಗಳನ್ನು ಬ್ಯಾಗ್ನಲ್ಲಿ ತುಂಬಿಕೊಂಡು ಹೋಗುತ್ತಿದ್ದಾರಲ್ಲಾ” ಎಂದು ನೆಟ್ಟಿಗರು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ. ಜೊತೆಗೆ, ಎಕ್ಸ್ಪೈರಿ ಆದ ಉತ್ಪನ್ನಗಳನ್ನು ವೈಜ್ಞಾನಿಕವಾಗಿ ನಾಶಪಡಿಸುವ ಬದಲು ಈ ರೀತಿ ರಸ್ತೆ ಬದಿಯಲ್ಲಿ ಎಸೆದಿರುವ ಕಂಪನಿಯ ನಿರ್ಲಕ್ಷ್ಯದ ಬಗ್ಗೆಯೂ ವ್ಯಾಪಕ ಆಕ್ರೋಶ ವ್ಯಕ್ತವಾಗಿದೆ.