ನವದೆಹಲಿ: ಸ್ವಾತಂತ್ರ್ಯ ಹೋರಾಟಗಾರ ಮತ್ತು ಇಂಡಿಯನ್ ನ್ಯಾಷನಲ್ ಆರ್ಮಿ (INA) ಸಂಸ್ಥಾಪಕ ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರ ಚಿತಾಭಸ್ಮವನ್ನು ಜಪಾನ್ನ ಟೋಕಿಯೊದಿಂದ ಭಾರತಕ್ಕೆ ತರಲು ನಿರ್ದೇಶನ ನೀಡುವಂತೆ ಕೋರಿ ಅವರ ಪುತ್ರಿ ಅನಿತಾ ಬೋಸ್ ಪಫ್ (Anita Bose Pfaff) ಅವರು ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿದ್ದಾರೆ. ಈ ಅರ್ಜಿಯ ವಿಚಾರಣೆ ನಡೆಸಿದ ಸುಪ್ರೀಂ ಕೋರ್ಟ್, ಮಂಗಳವಾರ ಕೇಂದ್ರ ಸರ್ಕಾರಕ್ಕೆ ನೋಟಿಸ್ ಜಾರಿ ಮಾಡಿದೆ.
ತ್ರಿಸದಸ್ಯ ಪೀಠದಿಂದ ವಿಚಾರಣೆ
ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್, ನ್ಯಾಯಮೂರ್ತಿಗಳಾದ ಜಾಯ್ಮಾಲ್ಯ ಬಾಗ್ಚಿ ಮತ್ತು ವಿ. ಮೋಹನ ಅವರನ್ನೊಳಗೊಂಡ ತ್ರಿಸದಸ್ಯ ಪೀಠವು ಈ ಅರ್ಜಿಯ ವಿಚಾರಣೆ ನಡೆಸಿತು. ಚಿತಾಭಸ್ಮ ವಾಪಸಾತಿ ವಿಚಾರವಾಗಿ ಕೇಂದ್ರ ವಿದೇಶಾಂಗ ಸಚಿವಾಲಯ ಮತ್ತು ಗೃಹ ಸಚಿವಾಲಯಗಳಿಗೆ ಪ್ರತಿಕ್ರಿಯೆ ನೀಡುವಂತೆ ಸುಪ್ರೀಂ ಕೋರ್ಟ್ ನಿರ್ದೇಶನ ನೀಡಿದೆ.
ಅರ್ಜಿದಾರರ ಪರವಾಗಿ ಹಿರಿಯ ವಕೀಲ ಅಭಿಷೇಕ್ ಮನು ಸಿಂಘ್ವಿ ವಾದ ಮಂಡಿಸಿದರು. ಜಪಾನ್ನ ಟೋಕಿಯೊದಲ್ಲಿರುವ ರೆಂಕೋ-ಜಿ (Renko-Ji) ದೇವಾಲಯದಲ್ಲಿ ಸಂರಕ್ಷಿಸಿಡಲಾಗಿರುವ ನೇತಾಜಿಯವರ ಚಿತಾಭಸ್ಮವನ್ನು ಭಾರತಕ್ಕೆ ತರುವ ಬಗ್ಗೆ ನಿರ್ಧಾರ ಕೈಗೊಳ್ಳಲು ಕೇಂದ್ರ ಸರ್ಕಾರ ವಿಳಂಬ ಧೋರಣೆ ಅನುಸರಿಸುತ್ತಿದೆ ಎಂದು ಅರ್ಜಿಯಲ್ಲಿ ಉಲ್ಲೇಖಿಸಲಾಗಿದೆ.
ಅಂತಿಮ ವಿಧಿವಿಧಾನದ ಆಸೆ
“ನೇತಾಜಿಯವರ ಏಕೈಕ ಜೀವಂತ ನೇರ ವಾರಸುದಾರರಾಗಿರುವ ಅನಿತಾ ಬೋಸ್ ಅವರು ತಮ್ಮ ತಂದೆಯ ಅಂತಿಮ ವಿಧಿವಿಧಾನಗಳನ್ನು ಗೌರವಯುತವಾಗಿ ಭಾರತದಲ್ಲಿ ನೆರವೇರಿಸಲು ಬಯಸಿದ್ದಾರೆ. 1945 ರಿಂದ ಜಪಾನ್ನಲ್ಲಿರುವ ಚಿತಾಭಸ್ಮವನ್ನು ಮರಳಿ ತರಲು ಅವರು ಹಲವು ಬಾರಿ ಭಾರತ ಸರ್ಕಾರಕ್ಕೆ ಮನವಿ ಮಾಡಿಕೊಂಡಿದ್ದರು. ಇದು ನೇತಾಜಿಯವರ ಸುದೀರ್ಘ ‘ಅಜ್ಞಾತವಾಸ’ವನ್ನು ಅಂತ್ಯಗೊಳಿಸುವ ಸಮಯ,” ಎಂದು ಅವರು ವಾದಿಸಿದ್ದಾರೆ.
ಮೊಮ್ಮಗನ ಅರ್ಜಿ ವಜಾಗೊಂಡಿತ್ತು
ಈ ಹಿಂದೆ ನೇತಾಜಿಯವರ ಮೊಮ್ಮಗ ಆಶಿಶ್ ರೇ ಅವರು ಇದೇ ವಿಚಾರವಾಗಿ ಅರ್ಜಿ ಸಲ್ಲಿಸಿದ್ದರು. ಆದರೆ ಸುಮಾರು ನಾಲ್ಕು ತಿಂಗಳ ಹಿಂದೆ ನ್ಯಾಯಾಲಯವು ಅದನ್ನು ತಿರಸ್ಕರಿಸಿ, ನೇತಾಜಿಯವರ ಕಾನೂನುಬದ್ಧ ವಾರಸುದಾರರಾಗಿರುವ ಅನಿತಾ ಬೋಸ್ ಅವರೇ ನೇರವಾಗಿ ನ್ಯಾಯಾಲಯವನ್ನು ಸಂಪರ್ಕಿಸಬೇಕು ಎಂದು ಸೂಚಿಸಿತ್ತು. ಅದರಂತೆ ಇದೀಗ 80 ವರ್ಷದ ಅನಿತಾ ಬೋಸ್ ಪಫ್ ಅವರು ಸುಪ್ರೀಂ ಕೋರ್ಟ್ಗೆ ಅರ್ಜಿ ಸಲ್ಲಿಸಿದ್ದಾರೆ.
1945 ರಲ್ಲಿ ಎರಡನೇ ಮಹಾಯುದ್ಧದ ಸಂದರ್ಭದಲ್ಲಿ ಜಪಾನ್ ಶರಣಾಗತಿಯಾದ ಬಳಿಕ, ಸಿಂಗಾಪುರದಿಂದ ಪ್ರಯಾಣಿಸುವಾಗ ತೈವಾನ್ನಲ್ಲಿ (ತೈಹೋಕು) ಸಂಭವಿಸಿದ ವಿಮಾನ ಅಪಘಾತದಲ್ಲಿ ನೇತಾಜಿ ಮೃತಪಟ್ಟಿದ್ದಾರೆ ಎಂದು ನಂಬಲಾಗಿದೆ. ಅವರ ಭೌತಿಕ ಶೇಷವನ್ನು 1945 ರ ಸೆಪ್ಟೆಂಬರ್ ಆರಂಭದಲ್ಲಿ ಟೋಕಿಯೊಗೆ ರವಾನಿಸಲಾಗಿತ್ತು.